या तुझ्या अमर्याद विस्तीर्ण पोकळीमध्ये अनंत सूर्यमंडलासहित या पृथ्वीवरील प्राणीमात्रासह मज मानवास निर्माण करून मला सद्सद्विचार करण्याची बुद्धि दिलीस व तुझ्या आज्ञेप्रमाणे सत्यास स्मरून मी या जगांत वर्तन केलें, हे तू जाणतोस, यास्तव तू माझा अंगिकार करशील, अशी माझी पूर्ण खात्री आहे आणि त्याचप्रमाणे माझ्या बाकी एकदर सर्व मानव बहीण-भावडांनी सत्यास स्मरून आचरण केल्याबरोबर त्याचाही अंगिकार निःसंशय करशील!! तुझी सत्यसत्ता वाढो !!!!
यशवंत प्र० मानव स्त्री अथवा पुरुषाचे प्राणोत्क्रमण झाल्याबरोबर त्याच्या प्रेताविषयी प्रथम काय करावे?
जोतीराव उ०- त्या प्रेतास घरातील एखाद्या हवाशीर खोलीत बिछान्यावर निजवावे आणि त्या खोलीत शवाजवळ एखाद्या पोक्त मनुष्यास मात्र बसवून एकंदर सर्व घरातील हवा स्वच्छ होण्याकरिता थोडाथोडा उद- कापूर जाळण्याचे सुरु करावे आणि बाकीच्या एकंदर सर्व कुटुंबांतील बायकापोरांस मोठमोठ्याने रडण्याचा कोल्हाळ करू न देता, त्यांसह एकंदर सर्व इष्टमित्रांनी खोलीच्या बाहेरच्या बाजूस बसून मृताने आजपावेतो आपल्या सर्वांच्या निर्मिकास स्मरून सत्य आचरण कसे केले, याविषयीं पक्का प्रहर अथवा दीड प्रहर विचार करीत बसावें.
