दूषित पाणी आणि उघड्यावरील अन्नपदार्थ खाल्ल्याने मुंबईकर पोटाच्या विविध आजारांनी बेजार झाले आहेत. यामुळे आरोग्य विभागासोबत महापालिकेनेही पाण्याची गुणवत्ता तपासण्यावर भर द्यायला हवा, याकडे त्यांनी लक्ष वेधले आहे.
पावसाळा सुरू झाल्यानंतर अनेक ठिकाणी दूषित पाण्याच्या पुरवठा होत असल्याच्या तक्रारी येतात. मुले, रोगप्रतिकारशक्ती कमी असलेले रुग्ण, वृद्ध यांना दूषित पाणी प्यायल्यामुळे त्रास होतो. ‘मागील काही दिवसांध्ये या तक्रारी वाढल्या आहेत. रुग्णांनी पाणी उकळून गार करून पिणे गरजेचे असते’, असे पोटविकारतज्ज्ञ डॉ. आशीष बहिरे यांनी सांगितले.
यावर्षी गॅस्ट्रोचे रुग्ण तुलनेने अधिक आहेत. दूषित पाण्याबरोबरच शिळे आणि अस्वच्छ जागेत तयार केलेले अन्न, उघड्यावर ठेवलेले पदार्थ यामुळे संसर्ग होऊन गॅस्ट्रो होतो. डायरिया हे ‘गॅस्ट्रो एन्टरायटिस’च्या मुख्य लक्षणांपैकी एक आहे. यामुळे शरीरातील पाण्याचे प्रमाण कमी होते. भूक मंदावते. दूषित पाणी वा अस्वच्छ अन्न पोटात गेल्यानंतर पुढील १२ ते ७२ तासांत हा त्रास सुरू होतो. काही रुग्णांमध्ये याची लक्षणे तीव्र असतात. अगदी दिवसाला २० ते ३० उलट्या आणि त्याच प्रमाणात जुलाब होतात.
ट्विटरवर संताप
प्रसिद्ध सिनेनिर्माते हंसल मेहता यांनी शुक्रवारी, आपल्या पोटदुखीसंदर्भातील तक्रार ट्विट करून शेअर केली. त्यांच्या डॉक्टरांनी रोज अशा स्वरूपाच्या पोटदुखीचा त्रास होणारे किमान दहा रुग्ण तरी येत असल्याचे त्यात म्हटले आहे. तीव्र पोटदुखी, पोटात कळ येणे या तक्रारी दूषित पाण्यामुळे निर्माण होतात. दोन उपमुख्यमंत्री असलेल्या या शहरामध्ये शुद्ध पाणी मुंबईकरांना का मिळू नये, असा प्रश्न विचारून संताप व्यक्त केला आहे. त्यांच्या ट्विटनंतर अनेक मुंबईकरांनी दूषित पाणी, अस्वच्छता याविषयी नाराजी व्यक्त केली आहे.
