बॉलिवूडचा किंग खान म्हणजेच शाहरुख खान 'जवान'मधून पुन्हा एकदा मोठ्या पडद्यावर प्रेक्षकांच्या भेटीला येत आहे. त्याच्या आधीच्या 'पठाण' या सिनेमाने बॉक्स ऑफिसवर अनेक रेकॉर्ड मोडले आणि आता 'जवान'चा प्रिव्ह्यू व्हिडिओ पाहिल्यानंतर चाहते आणखी उत्साहित झाले आहेत. सलमान खाननेही यावर आपली प्रतिक्रिया दिली आहे. त्याने SRK च्या चित्रपटाचा प्रिव्ह्यू व्हिडिओ सोशल मीडियावर शेअर केला आहे. पहिल्याच दिवशी तो नक्कीच हा चित्रपट पाहायला जाणार असल्याचेही त्याने सांगितले.
सलमान खानने मंगळवारी इंस्टाग्रामवर शाहरुख खानच्या आगामी 'जवान' चित्रपटाचा प्रिव्ह्यू व्हिडिओ शेअर केला. यासोबत त्याने कॅप्शनमध्ये लिहिले की, 'पठाण जवान बन गया, उत्कृष्ट ट्रेलर, खूप आवडला. आता हा एक चित्रपट आहे जो आपण फक्त थिएटरमध्येच पाहिला पाहिजे. मला खात्री आहे की मी तो पहिल्या दिवशी बघेन. मजा आली वाह….
'पठाण'मध्ये एकत्र दिसले शाहरुख-सलमान
सलमान आणि शाहरुख १९९० च्या दशकाच्या सुरुवातीपासून इंडस्ट्रीत काम करत आहेत. दोघांमध्ये कधी आंबट तर कधी गोड नातं असतं. त्यांनी १९९५ मध्ये 'करण अर्जुन' चित्रपटात एकत्र काम केले होते. हा चित्रपट हिट ठरला होता. पडद्यावर दोघांनी भावाची भूमिका साकारली होती. यानंतर दोघेही अनेकदा एकमेकांच्या सिनेमांमध्ये कॅमिओमध्ये दिसले. अगदी अलीकडचा चित्रपट 'पठाण' मध्येही ते एकत्र दिसले. यामध्ये सलमान त्याच्या 'टायगर' लूकमध्ये होता. दोघांचा ट्रेन फाईट सीन प्रेक्षकांना चांगलाच आवडला होता.
'टायगर वर्सेस पठाण'
याशिवाय शाहरुख आणि सलमान 'टायगर वर्सेस पठाण'मध्येही दिसणार आहेत. YRF Spy Universe चा हा चित्रपट असेल. हा भारतातील सर्वात महागडा चित्रपट असेल असेही सांगण्यात येत आहे.
शाहरुख खानची दुहेरी भूमिका
'जवान' बद्दल बोलायचे झाले तर याचे दिग्दर्शन साऊथचे दिग्दर्शक अॅटली यांनी केले आहे. या अॅक्शन सिनेमात शाहरुख दुहेरी भूमिकेत आहे. तो पिता-पुत्राची भूमिका साकारणार आहे. यात नयनतारा, विजय सेतुपती यांच्याही भूमिका आहेत. दीपिका पदुकोण, सान्या मल्होत्रा, प्रियामणी आणि रिद्धी डोगरा देखील दिसणार आहेत. यात संजय दत्त आणि थलपथी विजय यांचे कॅमिओ देखील आहेत. ७ सप्टेंबर २०२३ रोजी थिएटरमध्ये रिलीज होणार आहे.