भारताने वेस्ट इंडिजवर पहिल्या कसोटीत विजय साकारला. पण या सामन्यात यशस्वी जैस्वालचे एवढे कौतुक झाले की, रोहितचा हा मोठा विक३म कोणालाही समजला नाही. रोहितने हा विक्रम करत असताना ख्रिस गेल आणि शाहिद आफ्रिदीसारख्या धडाकेबाज फलंदाजांना मागे टाकलं आहे.
यशस्वी जैस्वालने या सामन्यात दीड शतक साकारले. पण त्याला रोहित शर्माचा विक्रम मोडता आला नाही. दुसरीकडे रोहितनेही या सामन्यात शतक झळकावले होते. त्यामुळेच भारतीय संघाला मोठी सलामी देता आली होती आणि तिथेच भारताच्या विजयाचा पाया रचला गेला होता. त्यामुळे रोहितची ही खेळी भारतासाठी महत्वाची ठरली होती. ही दमदार खेळी साकारताना रोहितने एक मोठा विक्रमही केला, पण यशस्वीच्या कौतुकात तो विक्रम झाकोळला गेला.
रोहित शर्माने या सामन्यात असा ४०० वा षटकार खेचला जो संघाच्या विजयात महत्वाचा ठरला. कारण संघाच्या विजयात सर्वाधिक षटकार खेचण्याचा विक्रम रोहितच्या नावावर आहे. त्यामध्ये महत्वाची गोष्ट म्हणजे संघाच्या विजयात रोहितचा यावेळी ४०० वा षटकार ठरला आहे. या विक्रमाच्या यादीत तर रोहितच्या आस पास कोणतेही खेळाडू नाहीत. कारण रोहितने ४०० षटकारांची वेस ओलांडली आहे, तर पाकिस्तानचा माजी कर्णधार शाहिद आफ्रिदीच्या नावावर संघाच्या विजयात २९९ षटकार असल्याचे समोर आले आहे. या यादीत त्यानंतर तिसऱ्या स्थानावर वेस्ट इंडिजचा धडाकेबाज सलामीवीर ख्रिस गेल आहे. गेलच्या नावावर संघाच्या विजयात २७६ षटकार आहेत. त्यामुळे या यादीत रोहितच्या जवळपास कोणताही खेळाडू नसल्याचे स्पष्ट झाले आहे. पण आंतरराष्ट्रीय क्रिकेटमध्ये एकंदरीत षटकारांच्या यादीत रोहित दुसऱ्या स्थानावर आहे. या यादीमध्ये गेल हा अव्वल स्थानावर आहे. पण रोहित लवकरच गेलचा हा विक्रमही नोडीत काढेल, असे आता दिसत आहे.
रोहित शर्माच्या नावावर आता एक अनोखा विक्रम नोंदवला गेला आहे. रोहितने ख्रिस गेल आणि शाहिद आफ्रिदी यांना कधीच मागे टाकले आहे.
